Vrasja e efektivit të policisë Enea Mekolli gjatë operacionit për kapjen e të shumëkërkuarit Violand Braçellari ka tronditur mbarë vendin, por dhimbja më e madhe ka pllakosur familjen e tij, e cila po përballet me një tragjedi të dytë.
Vetëm 34 vjeç, baba i dy fëmijëve të vegjël, Enea Mekolli humbi jetën në orët e para të mëngjesit të kësaj të enjteje gjatë një operacioni policor në zonën e Lozhanit, në Maliq. Efektivi u qëllua me plumb në kokë teksa po merrte pjesë në aksionin për arrestimin e Braçellarit, një person i shpallur në kërkim prej vitesh. Në përpjekje për të vënë në pranga një të arratisur nga drejtësia, ai ra në krye të detyrës, duke lënë pas familjen, kolegët dhe ëndrrat e ndërprera në mes.
Por kjo nuk është hera e parë që familja Mekolli goditet nga një humbje e rëndë. Disa vite më parë, familja humbi edhe djalin tjetër, i cili gjithashtu shërbente në radhët e Policisë së Shtetit. Ai ndërroi jetë pas një beteje të gjatë me leuçeminë.
Sot, fati duket se ka goditur sërish në të njëjtën derë. Dy djem, të dy policë, të dy të larguar nga jeta para kohe. Njëri i mposhtur nga sëmundja, tjetri i vrarë në krye të detyrës.
Dhimbja për familjen është e papërshkrueshme. Një nënë që ka përjetuar humbjen e një djali, tashmë detyrohet të përballet edhe me humbjen e djalit të dytë. Një tragjedi e dyfishtë që ka prekur jo vetëm të afërmit e Enea Mekollit, por edhe kolegët dhe komunitetin ku ai jetonte.
Ndërsa vendi nderon sakrificën e efektivit 34-vjeçar, familja Mekolli po përgatitet t’i japë lamtumirën e fundit djalit të saj të dytë, në një histori që ka prekur thellë opinionin publik.
