Prokuroria e Tiranës ka dërguar në gjyq shtetasin Ermes Hoxhalli, i cili akuzohet se ka mashtruar zyrtarë të Ministrisë përmes falsifikimeve, duke premtuar bursa studimi falas dhe udhëtime në SHBA.
Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka përfunduar hetimet dhe ka dërguar në gjyq Ermes Hoxhallin për veprat penale të “Falsifikimit kompjuterik” dhe “Falsifikimit të dokumenteve”, sipas nenit 186/a/1 dhe 186/2 të Kodit Penal.
Ai është hetuar nën masën e sigurisë “Arrest në burg”.
Në kuadër të hetimeve të procedimit penal nr. 1819, datë 11.03.2024, rezultoi se shtetasi Ermes Hoxhalli krijoi një identitet të rremë si Klea Rama dhe, duke përdorur kredencialet e një diplomateje të lartë të Ambasadës së Shteteve të Bashkuara në Tiranë, arriti të mashtronte zyrtarë të nivelit lokal në Shqipëri. Ai pretendoi se udhëhoqi një projekt për të rinjtë, nën emrin “Let’s talk together aboutUS’23 dhe 24”, dhe lëshoi 19 çertifikata pjesëmarrjeje për nxënës, si dhe për të paktën një mësues nga Shkolla e Mesme “Ali Demi” në Vlorë, me temë “Projekti Let’s talk together about US’23”.
Gjatë hetimeve, Prokuroria e Tiranës sekuestroi dokumente të falsifikuara, përfshirë çertifikata, vula, firma, logot, foto dhe video, të cilat iu gjetën shtetasit Hoxhalli në laptopin dhe telefonat e tij celularë. Po ashtu, u identifikua adresa e e-mailit [email protected], me të cilën ai komunikonte me zyrtarë të Ministrisë së Arsimit.
Nga analiza e këtyre provave, u arrit në përfundimin se veprimet e shtetasit Ermes Hoxhalli plotësojnë të gjitha elementët e veprave penale të “Falsifikimit kompjuterik” dhe “Falsifikimit të dokumenteve”, të parashikuara nga nenet 186/a/1 dhe 186/2 të Kodit Penal.
