SPAK ka zgjeruar hetimet për tenderin e mbikëqyrjes së punimeve të tunelit të Llogarasë, duke urdhëruar sekuestrimin e dokumentacionit të kompanisë “Hill International NV”.
Ky veprim vjen në kuadër të çështjes penale ndaj ish-drejtorit të Autoritetit Rrugor Shqiptar, Evis Berberi, dhe ish-ortakut të tij, biznesmenit Valter Begaj.
Tenderi në fjalë u fitua nga bashkimi i operatorëve ekonomikë “Hill International NV” dhe kompania “Net Group” e Begajt, pranë Ministrisë së Infrastrukturës dhe Energjisë për mbikqyrjen e punimeve për tunelin e Llogarasë.
Prokuroria e Posaçme dyshon se procedura është manipuluar dhe fituesi është paracaktuar, ndërkohë që kompanitë e tjerë janë skualifikuar në mënyrë të padrejtë, si pasojë e lidhjes mes Berberit dhe Begajt.
SPAK e akuzon ish-kreun e ARRSH-së, Evis Berberi, se ka përdorur një kompani të kontrolluar prej tij në mënyrë të tërthortë për të favorizuar Valter Begajn në tendera publikë.
Ai shihej si një nga njerëzit më të afërt të zv.kryeministres dhe ministres së Infrastrukturës, Belinda Balluku.
Në lidhje me këtë aferë, ish-zv.kryeministri Arben Ahmetaj, i cili ndodhet jashtë vendit, ka deklaruar publikisht se pas tenderit të tunelit të Llogarasë qëndron një skemë korrupsioni që implikon Ballukun dhe Edi Ramën.
