Presidenti i Partisë së Lirisë, Ilir Meta, pritet të paraqitet sot në orën 11:00 në Prokurorinë e Posaçme, ku do t’i komunikohet zyrtarisht përfundimi i hetimeve dhe akuzat ndaj tij.
Ky proces duhej të kryhej që të hënën e kaluar, por u shty për shkak të mungesës së avokatit mbrojtës, i cili ndodhej jashtë vendit.
Ilir Meta u arrestua më 21 tetor 2024 dhe së bashku me bashkëshorten e tij, deputeten Monika Kryemadhi, janë vënë nën hetim për një sërë veprash penale që dyshohet se janë kryer gjatë 15 viteve të fundit.
Sipas SPAK, ata kanë bashkëpunuar me zyrtarë të tjerë për të favorizuar kompani private në shkëmbim të përfitimeve të konsiderueshme financiare. Ndër aktivitetet e dyshuara përfshihen lobime në SHBA dhe transaksione për shitblerje pasurish të paluajtshme, të cilat nuk janë deklaruar në institucionet përkatëse si ILDKPKI dhe KQZ.
Monika Kryemadhi është nën hetim për tre akuza: pastrim parash, korrupsion dhe mosdeklarim të të ardhurave. Më 23 tetor, Gjykata vendosi të lërë në fuqi masën e sigurisë “detyrim për t’u paraqitur në Policinë Gjyqësore” për Kryemadhin dhe të hetuarën tjetër Ema Çoku, e akuzuar për pastrim parash.
Ndërkohë, ndaj Piro Xhixhos, i hetuar për korrupsion pasiv, masa e sigurisë u lehtësua nga “arrest në shtëpi” në “detyrim për t’u paraqitur”.
Të tre të hetuarit janë të detyruar të paraqiten një herë në muaj pranë Policisë Gjyqësore të SPAK, në kuadër të masave të sigurimit të vendosura ndaj tyre.
