Këtë vit SHBA është angazhuar shumë për të arritur një marrëveshje mes Kosovës dhe Serbisë, madje Trump dërgoi edhe Richard Grenell në Ballkan për të dakorduar palët.
SHBA i ka kërkuar Kosovës që të heq taksën 100% ndaj Serbisë dhe për më tepër kërcënoi se do anulojë investimet nëse nuk e bën këtë gjë.
Pas kësaj, Kurti u shpreh i gatshëm për ta hequr taksën pavarësisht nëse Beogradi zyrtar kërkon apo jo falje për genocidin në Kosovë, megjithatë deri më tani nuk është arritur asnjë marrëveshje.
Ndërkohë, dje u raportua se Ambasadori i SHBA-së, Philip Kosnett, i ka thënë Kryeministrit Kurti se SHBA po shqyrton edhe mundësinë e heqjes së trupave të saj nga Kosova, nëse nuk hiqet taksa ndaj Serbisë.
Presioni i shtuar nga SHBA ka sjellë edhe krisjet e para në koalicionin qeverisës VV-LDK, pasi kryetari i LDK Isa Mustafa i ka kërkuar Kurtit që të koordinojë masën e reciprocitetit me SHBA, pasi në marrëveshjen qeverisëse mes Lëvizjes Vetëvendosja dhe LDK parashikohet zëvendësimi i tarifës ndaj produkteve serbe vetëm më kushtin që Serbia të njohë Kosovën.
“Themelore është që procesi të bashkërenditet me SHBA-të, si partner strategjik i yni. Çështjet e tjera mbesin modalitete”, ka thënë Mustafa.
Mirëpo, Kurti është shfaqur sërish i pavendosur nëse do i nënshtrohet presionit të amerikanëve apo do pranojë të heqë taksën ndaj mallrave serbe vetëm me kushtin që ka firmosur në kontratën me LDK.
“Do të zëvendësojmë tarifën 100% dhe do të zbatojmë reciprocitetin e plotë tregtar me Serbinë sikurse me secilin shtet. Tarifa ka qenë vendim i qeverisë së kaluar. Ne nuk jemi për tarifa si masë ndëshkuese ndaj konsumatorit por për reciprocitet si masë mbrojtëse ndaj prodhuesve“, tha Kurti.
Kujtojmë se presidenti Hashim Thaçi është shprehur kundër vendosjes së masës së reciprocitetit: “Nuk guxojmë të marrim vendime populiste – për të thënë se po e ndëshkojmë Serbinë, kurse në të vërtetë të largohemi nga Bashkimi Evropian dhe SHBA-ja”, ka thënë Thaçi.
Ndërsa Haradinaj i ka kërkuar Kurtit publikisht të mos e heqë taksën.
