Gjykata Kushtetuese ka zbardhur të arsyetur vendimin për heqjen e herësit zgjedhor. Në vendimin e plotë thuhet se është pranuar pjesërisht kërkesa e Bindjes Demokratike dhe Lëvizjes Demokratike Shqiptare për shfuqizimin e pikës 3 të nenin 163. Sipas këtij neni, të zgjedhurit e parë nga kryetari i partisë kishin më shumë shanse të bëheshin deputetë, ndërsa të tjerët duhej të thyenin të ashtuquajturin herës. Tashmë, me shfuqizimin e nenit ai që ka më shumë vota futet në parlament pavarësisht renditjes në lista.
“Për rrjedhojë, Gjykata vlerëson se parashikimi i herësit, lidhur me vlerën e tij numerike, i përcaktuar në pikën 3 të nenit 163 të Kodit Zgjedhor, si një ndër kriteret që ndikon në shpërndarjen e mandateve, cenon të drejtën për të zgjedhur, pasi nuk përmbush kriterin e proporcionalitetit”, thuhet në vendimin e Gjykatës.
Çfarë parashikon pika 3 e nenit 163:
- Në fillim përfitojnë mandat kandidatët që kanë marrë një numër votash parapëlqyese më të madh se herësi që del nga pjesëtimi i numrit të votave të subjektit me numrin e mandateve të fituara nga subjekti, sipas nenit 162 të këtij Kodi. Në çdo rast, herësi nuk mund të jetë më shumë se 10 000 vota. Në rast se herësi që përftohet nga pjesëtimi është një numër me mbetje dhjetore, si herës merret numri i plotë më i afërt.
Gjithsesi ky vendim nuk ka efekt prapaveprues dhe nuk vlen për zgjedhjet e kaluara, por do të shërbejë në zgjedhjet e ardhshme për hapjen 100% të listave.
