Erald Çarçiu, prind i dy vajzave binjake që frekuentonin kopshtin publik në Gramsh, ka akuzuar autoritetet për mungesë transparence lidhur me ngjarjen e helmimit të fëmijëve.
Në një intervistë për “Kafe Shqeto”, ai deklaroi se vetëm mbrëmjen e kaluar janë konfirmuar 14 raste me salmonelë, ndryshe nga raportimet zyrtare që flasin për vetëm 4 raste.
Sipas tij, gjithçka ka nisur rreth 10 ditë më parë, pas konsumimit të një supe pule në kopësht, pas së cilës fëmijët kanë nisur të shfaqin shenja helmimi.
Çarçiu ngriti dyshime për qëndrimin e heshtur të institucioneve dhe shtroi pyetjen se “kë po përpiqen të mbulojnë”.
“Akoma vazhdojnë ta mbajnë mbuluar, në mënyrë sekrete nëpër e-mail personale. Nuk arrij ta kuptoj pse është ky mbulim kur edhe ne kemi nevojë të na japin edhe këshilla, si të veprojmë me fëmijët. Ata fëmijët e prekur, si duhet të kurohen, ku duhet të kurohen. Nuk e kuptoj këtë heshjen, pse duhet ta mbulojnë, çfarë halli kanë që duan ta mbulojnë. Këtë nuk arrij ta kuptoj.
Janë 14 raste fëmijë dhe staf, nuk janë 4. Është konfirmuar edhe tek të tjerët. Të premten e kaluar, fëmijët kanë konsumuar supë pule dhe pastaj kanë filluar shenjat. Një e nga një fëmijët. Përgjigjet e analizave këtu i vonuan, i kanë nxjerrë ditën e djeshme për 10 vetë. Me prindërit e fëmijëve që unë kam biseduar, ka një shqetësim. Me njërin prej tyre që unë kam qenë mbrëmë, fëmija kishte ende probleme. Shumica e fëmijëve e marrin mjekimin në shtëpi,” tha ai.
