Rreth 30 persona janë helmuar pasditen e sotme në Bulqizë.
Bëhet me dije se helmimi ka ndodhur në Shupenzë, ku 30 persona janë helmuar dhe janë detyruar të shkojnë pranë qendrës shëndetësore për të marrë trajtim mjekësor.
Filllimisht kanë qenë 3 anëtarë të një familjeje që janë helmuar, ndërsa dyshohet se ky helmim ka ardhur për shkak se uji i pijshëm është bashkuar me ujërt e zeza, pasi janë dëmtuar tubacionet.
Ndërkohë që në Qendrën Shëndetësore të Shupenzës kanë vazhduar që të shkojnë edhe persona të tjerë nga e gjithë zona, ndërsa mjekët shprehen se ende nuk e dinë nga ka ardhur helmimi.
Në lidhje me helmimin masiv të qytetarëve ka reaguar edhe Bashkia e Bulqizës.
Pasi u përfol se helmimi mund të kishte ardhur nga uji i pijshëm i cili ishte përzier me ujërat e zeza, bashkia e mohoi diçka të tillë.
Reagimi i plotë:
PËRGËNJESHTRIM I LAJMIT MBI HELMIMIN E BANORËVE NË SHUPENZË
Nisur nga një lajm i publikuar nga disa media të Tiranës në lidhje me helmimin e rreth 30 banorëve të Njësisë Administrative Shupenzë, Bashkia Bulqizë bën me dije se ky është një lajm i pavërtetë.
Menjëherë pas publikimit të lajmit, Bashkia Bulqizë bëri verifikimet e nevojshme dhe të gjitha pretendimet rezultojnë të jenë të pavërteta. Në lidhje me këtë çështje, bëjmë me dije se në Njësinë Administrative #Shupenzë nuk ka kanalizim të ujërave të zeza, siç pretendohet në lajm. Rrjeti i ujësjellësit në këtë njësi është i ri dhe nuk ka dëmtime në asnjë linjë të ujësjellësit që furnizon me ujë Shupenzën si qendër dhe fshatrat përreth saj si Okshatina, Homeshi dhe Boçeva.
Gjatë tre ditëve të fundit, ekipet teknike të ujësjellësit kanë monitoruar çdo segment që përbënte rrezik për tu dëmtuar nga reshjet e shiut dhe prurjet e lumenjve dhe përrenjve. Nga ky monitorim rezulton se të gjithë rezervuarët dhe vendburimet e ujit janë me elementë të plotë sigurie dhe të monitoruar nga manovruesit dhe rojat e ujësjellësit.
Gjithashtu është verifikuar edhe cilësia e ujit në të gjithë rezervuarët e fshatrave dhe është konstatuar se gjithçka është brenda normalitetit.
Gjatë pasdites së sotme janë marrë katër kampionë uji në katër pika të ndryshme, dy në Shupenzë dhe dy në Okshtatinë dhe pritet që nesër të dalin përgjigjet e analizave./Gazetareforma.com/
