Banorët e Kaçinarit në Mirditë kanë dalë sërish në protestë kundër ndërtimit të katër hidrocentraleve në zonë, duke ngritur shqetësimin se këto projekte dëmtojnë lumenjtë dhe ekosistemin lokal.
Të grumbulluar në Qafë Vorrez, ku ndodhet kantieri i firmës koncesionare, protestuesit mbanin pankarta dhe kërkonin largimin e makinerive nga zona, duke deklaruar se do të vijojnë rezistencën ndaj projekteve që, sipas tyre, rrezikojnë burimet ujore dhe jetesën e komunitetit.
Lejet për ndërtimin e hidrocentraleve janë miratuar fillimisht në vitin 2019 dhe janë rinovuar më pas sipas ligjit. Pas protestës, kompania ndërtuese reagoi duke sqaruar se mjetet kanë nisur punën në terren, fillimisht për rehabilitimin e infrastrukturës dhe më pas për ndërtimin e hidrocentraleve.
Sipas kompanisë, investimi prej 1.5 milionë eurosh synon jo vetëm ndërtimin e HEC-eve, por edhe përmirësimin e rrugëve dhe kushteve në zonë, duke ndihmuar në zhvillimin ekonomik dhe turistik të Kaçinarit. Përfaqësuesit e firmës theksuan se projektet nuk do të dëmtojnë mjedisin dhe burimet ujore.
