Ky do jetë viti i fundit i Hashim Thaçit në politikë, pasi pas mbarimit të mandatit të tij si president i Kosovës, Thaçi do tërhiqet nga jeta diplomatike e politike e vendit.
Në një intervistë për ORA News, kreu i Kosovës është shprehur se nuk do kandidojë për një mandat të dytë në postin e presidentit, duke shtuar se mezi pret shkurtin e 2021 për tu liruar nga petku institucional, politik dhe publik dhe për të nisur atë që ai e quan “jetë të re”.
“E kam vendosur, nuk do të jem kandidat për president në mandatin tjetër. Dy dekada është e mjaftueshme në krye të institucioneve të vendit, mendoj se ka energji, vullnet dhe njerëz të ri që do të mund të shtyjnë procesin final, pas lirisë dhe pavarësisë, të anëtarësimit në NATO dhe BE. Kosova është në drejtimin e duhur dhe nuk do të mund ta cënojë askush këtë rrugëtim strategjik të vendit që në të ardhmen e afërt të jemi pjesë e NATO-s dhe BE dhe ky rrugëtim, nuk duhet të jetë i personalizuar me Hashim Thaçin por me vlerat dhe standardet që do të punojmë në të ardhmen. Mendoj të zhvilloj një jetë të re. Nga ana ime është e prerë. Mezi pres që të vijë shkurti dhe të lirohem nga petku institucional, politik dhe publik. Jo se jam i lodhur por me vullnetin më të madh”, është shprehur Presidenti i Kosovës Hashim Thaçi.
Muajt e fundit Thaçi ka patur probleme me shëndetin dhe mediat kanë raportuar se ka shkuar disa herë për kontroll në spital, teksa në prill ai i është nënshtruar një operacioni pas problemeve me veshkat.
Hashim Thaçi është presidenti i pestë i Republikës së Kosovës dhe ka qenë kryeministri i parë i Kosovës së pavarur, Ministër i Jashtëm dhe zëvendëskryeministr në kabinetin e ri të kryesuar nga Isa Mustafa, i cili mori detyrën më 12 dhjetor 2014.
Thaçi ishte gjithashtu kreu i Partisë Demokratike të Kosovës (PDK).
Ai u ngrit në rend të parë si kreu politik i Ushtrisë Çlirimtare të Kosovës (UÇK) dhe gjithashtu ka shërbyer si kreu i një qeverie të përkohshme në fund dhe menjëherë pas luftës në vitin 1999.
