Dy persona, një 23-vjeçar dhe një 15-vjeçar, janë kapur nga policia teksa po përpiqeshin të kryenin një vjedhje në zonën e njohur si “Qyteza e fëmijëve” në Korçë. Të dy u ndaluan në flagrancë në lagjen nr. 10, dhe hetime të mëtejshme kanë zbuluar se ata dyshohen të kenë vjedhur më parë 7 celularë nga një dyqan në lagjen nr. 9 të qytetit.
Gjithashtu, ata janë të dyshuar për një tentativë vjedhjeje në një banesë në lagjen nr. 13. Si provë materiale, janë sekuestruar 7 celularët e vjedhur.
Ndërsa, një 26-vjeçar nga Bilishti u procedua në gjendje të lirë pasi dyshohet se ka kundërshtuar urdhërat e punonjësve të “Frontex” për të ndaluar mjetin e tij në hyrje të fshatit Bitinckë.
Në një rast tjetër, Policia e Pogradecit ka dorëzuar në Prokurori materialet për procedimin në gjendje të lirë të tre shtetasve të tjerë, të moshave 46, 41 dhe 37 vjeç, të cilët banojnë në Pogradec. Ata dyshohen se kanë sulmuar një shtetas në lagjen nr. 4 të qytetit, duke i shkaktuar atij dëmtime të lehta trupore.
Së fundmi, Sektori i Hetimit të Krimit të Drejtorisë Vendore të Kufirit dhe Migracionit Korçë ka nisur procedimin në gjendje të lirë për një 36-vjeçar nga fshati Pirg, Maliq. Ai u kap gjatë kontrollit të një kamioni që drejtonte, ku u zbuluan të fshehur katër emigrantë që synonin të kalonin ilegalisht kufirin në pikën e Kalimit Kufitar Kapshticë.
Të gjitha materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme ligjore.
