Sektori bankar po mendon seriozisht që t’i japë një “dorë” sektorit të turizmit dhe atyre që lidhen me të, duke i kredituar. Kjo për vet faktin se ky sektor shikohet nga ekspertët si një sektor që i gjeneron shpejt të ardhurat.
Sektorët e lidhur me turizmin dhe udhëtimet ishin ndër më të goditurit nga pandemia e Covid-19. Pasojat për këta sektorë priten të kenë një reflektim edhe marrëdhëniet e këtyre bizneseve me bankat, përfshi këtu cilësinë e kredisë ekzistuese dhe kredi dhënien e re.
Megjithatë, po të shohim të dhënat e kredisë së re në muajt pas pandemisë, shifrat tregojnë një rritje të ndjeshme.
Sipas statistikave të Bankës së Shqipërisë, për tre muajt pas mbylljes së ekonominë, në periudhën qershor-gusht, për sektorin e akomodimit dhe shërbimit ushqimor kredia e re kishte vlerën e 3.34 miliardë lekëve, në rritje me 131% krahasuar me të njëjtën periudhë të një viti më parë.
Ky sektor përfshin kryesisht bizneset e hoteleve dhe të restoranteve, ndër më të prekurit nga kufizimet e lëvizjeve ndërkufitare dhe nga rënia drastike në numrin e turistëve të huaj.
Kreditimi për transportin
Një tendencë e ngjashme vërehet në kredinë e re për sektorët e transportit dhe magazinimit. Sipas Bankës së Shqipërisë, kredia e re arriti në afro 4.7 miliardë lekë, me një rritje 4.3 herë krahasuar me një vit më parë. Edhe ky sektor ka qenë një ndër më të prekurit nga kriza, sidomos në pjesën që lidhet me transportin e udhëtarëve.
Pavarësisht ekspozimit të ndjeshëm ndaj rreziqeve të krizës, shifrat tregojnë se këta sektorë kanë gjetur më shumë mbështetjeje nga sektori bankar. Shumica e bankave, në fakt, adoptuan një strategji për mbështetje më afatgjatë të bizneseve që vuajtën pasojat më të rënda nga kriza.
Kjo qasje përfshinte ristrukturime afatgjata të kredive, deri në dy vjet, me qëllim krijimin e frymëmarrjes për t’i mbijetuar efekteve të krizës. Por, kjo mbështetje duket se është shoqëruar edhe me financime të reja, për të rritur shanset e mbijetesës së këtyre sipërmarrjeve.
Një qasje e tillë është sigurisht edhe në interesin e bankave, në rastin kur supozohet se vështirësitë e lidhura me pandeminë do të tejkalohen dhe ekonomia do të ketë një rimëkëmbje relativisht të shpejtë.
Mbështetja e bizneseve për të kaluar goditjen e krizës ishte edhe objekt i skemës së dytë të garancisë sovrane të qeverisë shqiptare. Prej muajsh, Ministria e Financave nuk ka publikuar të dhëna mbi shfrytëzimin e fondit të garancisë prej 16 miliardë lekësh, megjithatë, sipas bankave, deri tani rezultatet kanë qenë zhgënjyese.
Në fund të muajit gusht, ekspozimi i sektorit bankar në sektorët e lidhur me turizmin dhe transportin ishte relativisht i ulët, për një portofol total prej rreth 23 miliardë lekësh.
Kjo shumë përbën 6.5% të portofolit total të kredisë për biznesin ose 3.9% të gjithë kredisë për ekonominë vendase.
/Burimi: Monitor.al/ Përshtati: GazetaReforma.com/
