Hamasi pritet të refuzojë propozimin më të fundit të paraqitur nga Shtetet e Bashkuara për një armëpushim në Rripin e Gazës dhe lirimin e pengjeve.
Një zyrtar i lartë i këtij grupi deklaroi se plani nuk i adreson kërkesat thelbësore të Hamasit, përfshirë përfundimin e plotë të luftës. Sipas tij, përgjigjja zyrtare do të jepet në kohën e duhur.
Ndërkohë, Shtëpia e Bardhë konfirmon se Izraeli ka pranuar skicën e përgatitur nga i dërguari amerikan Steve Witkoff dhe tashmë pritet vendimi përfundimtar i Hamasit.
Sipas mediave izraelite, propozimi përfshin një armëpushim 60-ditor dhe shkëmbim pengjesh: lirimin e 10 pengjeve që janë ende gjallë dhe dorëzimin e trupave të 18 të tjerëve që besohet se kanë vdekur, në këmbim të lirimit të disa të burgosurve palestinezë nga burgjet izraelite.
Kujtojmë se më 18 mars përfundoi armëpushimi i mëparshëm dy mujor, i ndërmjetësuar nga SHBA, Katari dhe Egjipti.
Vetëm një ditë më pas, më 19 mars, Izraeli rifilloi ofensivën tokësore dhe rivendosi bllokadën e plotë mbi Gazë. Operacioni i fundit ushtarak është përshkallëzuar ndjeshëm, me synimin e shpallur nga kryeministri Netanyahu për marrjen e kontrollit të plotë të territorit.
Ministria e Shëndetësisë në Gaza, e kontrolluar nga Hamasi, raportoi se rreth 4,000 persona janë vrarë në dhjetë javët e fundit.
Kombet e Bashkuara nga ana tjetër njoftojnë se mbi 600,000 banorë janë zhvendosur përsëri për shkak të operacioneve tokësore izraelite dhe urdhrave të evakuimit.
Për më tepër, një raport i mbështetur nga OKB paralajmëron se rreth 500,000 persona në Gaza mund të përballen me uri në nivele katastrofike në muajt në vijim, duke thelluar më tej krizën humanitare në këtë territor.
