Një prej monumenteve më të rralla të trashëgimisë osmane në Shqipëri është kthyer në një atraksion të ri turistik në zemër të Durrësit.
Bëhet fjalë për hamamin e ndërtuar në shekullin XVIII, i cili, pas një restaurimi të plotë me fond prej 32 milionë lekësh nga programi i Bashkimit Europian për kulturën, ka rihapur dyert për publikun.
Monumenti i kategorisë së parë ishte i mbyllur për dekada për shkak të amortizimit dhe dëmtimeve të pësuara, veçanërisht gjatë tërmetit të vitit 2019.
Ky është një nga vetëm dhjetë hamamet historikë që kanë mbijetuar në Shqipëri dhe tashmë mund të vizitohet për herë të parë nga turistë vendas dhe të huaj.
Sipas Drejtorit të Qendrës Muzeore të Durrësit, Alban Ramohitaj, objekti ka një rëndësi të veçantë për identitetin kulturor të qytetit:
“Me hapjen e hamamit, plotësojmë një pjesë të mozaikut historik që na ka munguar. Ky objekt nuk është thjesht një monument, por një dëshmi autentike e jetës urbane të qytetit në periudhën osmane,” – u shpreh Ramohitaj.
Hamami ndodhet përgjatë bulevardit “Epidamn” dhe në të kaluarën shërbente si banjë publike deri në fund të shekullit XIX.
Në fillim të viteve 2000, godina u përdor përkohësisht si kafene, por më pas u braktis dhe u dëmtua rëndë nga tërmeti. Sot, pas restaurimit, është integruar në rrjetin e monumenteve që formojnë itinerarin historik të Durrësit.
Një tjetër objekt me rëndësi në qytet që u dëmtua nga tërmeti i vitit 2019 është edhe Muzeu Arkeologjik Kombëtar, ku prej tre vitesh vijojnë punimet restauruese. Sipas planifikimeve, muzeu do të hapet për vizitorët në vjeshtën e këtij viti.
Ndërkohë, numri i turistëve në sitet arkeologjike dhe historike të Durrësit po njeh rritje të ndjeshme.
“Viti 2025 ka nisur mbarë. Deri tani kemi pritur rreth 10 mijë turistë më shumë se në të njëjtën periudhë të një viti më parë,” – shtoi Ramohitaj.
Me rihapjen e hamamit dhe pritshmëritë për rihapjen e muzeut, Durrësi po konsolidohet gjithnjë e më shumë si një destinacion i rëndësishëm për turizmin kulturor në Shqipëri.
