Hakerat e Homeland Justice nuk ndalen. Ata kanë publikuar këtë të dielë të dhënat e Drejtorit të Përgjithshëm të Policisë së Shtetit, Muhamet Rrumbullaku. Krahas Drejtorit të Policisë hakerat iranianë kanë publikuar edhe të dhënat të nëndrejtorit të ri të SHISH Oljan Kanushi. Në dokumentat e postuara në kanalin e tyre në rrjetin social Telegram hakerat kanë publikuar edhe hyrje-daljet e kreut të Policisë së Shtetit, si dhe të Kanushit. Ndërkohë vetëm pak kohë më parë u publikuan emrat e drejtuesve dhe shefave të sektorëve në Shërbimin Informativ Shtetëror (SHISH). Kujtojmë se edhe parardhësit të Rumbullakut, Gledis Nanos iu publikuan të njëjtat të dhëna gjithashtu edhe disa emaile. Kryeministri Rama në fillim të këtij skandali deklaroi se nuk janë prekur të dhënat e shqiptarëve dhe asnjë e dhënë kofidenciale, por hakerat duke u bazuar edhe në citimet e tyre janë të betuar për ta demaskuar shtetin shqiptar. Edhe vetë kryeministri nuk i shpëtoi shinjestrës së hakerave pasi Homeland Justice publikoi të dhëna dhe për të.
Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të këtij viti, që bllokoi të gjitha faqet zyrtare shtetërore dhe platformën e shërbimeve online e-Albania.
Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.
