Hakerat iranianë nuk ndalen në publikimin e të dhënave nga sistemet shqiptare të cilat janë vjedhur disa muaj më parë.
Ditën e sotme rupi i hakerave “Homeland Justice” ka publikuar 214 file në pdf që korrespondojnë 214 dëshmi penaliteti për punonjësit e Ministrisë së Brendshme.
Ato këto kanë dalë gjatë vitit 2019 -2020 dhe në kokë të tyre shkruan Shërbimi Informativ Shtetëror.
Dokumentet nuk kanë ndonjë sekret shtetëror, i cili mund të sjellë dëme për vendin tonë, pasi janë thjesht dokumente që vërtetojnë se ata nuk kanë qenë të dënuar, kanë rekorde kriminale apo ka një proces hetimor ndaj tyre.
Kjo nuk është hera e parë që të dhëna sensitive dalin në publik pas dy sulmeve kibernetike ndaj Shqipërisë. Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të këtij viti, që bllokoi të gjitha faqet zyrtare shtetërore dhe platformën e shërbimeve online e-Albania.
Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet
Vlen të theksojmë që teksa taksapaguesit shqiptarë paguajnë për sistemin e sigurisë, ku pretendohet që AKSHI të mbajë përgjegjësi, ndodh e kundërta.
Të dhënat tona janë vjedhur para disa muajsh dhe tashmë po dalin “sheshit” çdo ditë e më shumë. Nga ana tjetër kryeministri Rama mburret se Shqipëria mban vendin e tetë në Europë për ofrimin e shërbimeve online.
Ndërkohë si për paradoks para disa javësh u publikuan nga hakerat iranianë vetë të dhënat mbi hyrjet dhe daljet e kryeministrit Edi Rama nga vendi.
Para disa ditësh hakerat iranianë kanë zbardhur të gjitha hyrjet dhe daljet e kryeministrit shqiptar Edi Rama, i cili ka udhëtuar vetëm përmes aeroportit të Rinasit. Disa javë më parë “Homeland Justice” nxori të dhënat e ish-kreut të SHISH, Helidon Bendo dhe bashkëshortes së tij. Ata kanë publikuar edhe hyrje-daljet e saj nga Shqipëria. Në dokumente shihet sa herë gruaja e ish-kreut të SHISH e ka kaluar kufirin shqiptar, nga cila pikë kufitare ka dalë dhe me çfarë mjeti ka udhëtuar.
