Ditën e sotme kryeministri Edi Rama ka hedhur votën e tij në një prej qendrave të votimit në Surrel, teksa është shoqëruar nga bashkëshortja e tij.
Pasi shprehu të drejtën e votës, kryeministri u ndal në një prononcim për mediat, ku i bëri thirrje qytetarëve që të votojnë. Rama uron që kjo situatë e krijuar nga KQZ të mos ketë ndikuar në dekurajimin e qytetarëve për të shkuar sërish në qendrat e votimit dhe për të ushtruar të drejtën e votës.
“Besoj janë thënë të gjitha ato që duheshin thënë. Tani është momenti që qytetarët të thonë fjalën e tyre. Uroj shumë që situata e krijuar nga KQZ të mos ketë ndikuar në dekurajimin e atyre që kanë shkuar të votojnë qysh në fillim në ato zona ku nuk punuan aparaturat dhe që të gjithë ata që mund të jenë dekurajuar, të rikthehen që vullneti të shkojë i plotë në të gjithë territorin e shqipërisë, për kandidatët dhe këshillat bashkiakë.”, tha Rama.
Ndërkohë, pyetjes se si e komentonte deklaratën e Berishës, se në sistem kanë ndërhyrë hackerat iranianë, Rama iu përgjigj: “edhe unë duhet t’i përgjigjem kësaj?”.
Kujtojmë që KQZ ka vendosur që në të gjitha qendrat ku ka probleme me pajisjen “PEI” të identifikimit të qytetarëve mund të vijohet në mënyrë manuale.
