Një konflikt që dyshohet se ka nisur fillimisht në rrjetet sociale mes adoleshentëve është kthyer në një sherr masiv, duke lënë të plagosur rëndë një 15-vjeçar. Ngjarja u regjistrua në rrugën “Laguna e Karavastasë”, në zonën e ish-Kënetës në Durrës, ku të rinjtë kishin lënë takim me pretendimin për t’u sqaruar pas debatit online.
Dy adoleshentët kanë mbërritur në vendin e takimit së bashku me shokë të tjerë dhe pas debateve me tone të ashpra situata degjeneroi në përleshje fizike. Grupet u përplasën duke përdorur edhe sende të forta, ndërsa përshkallëzimi i dhunës përfundoi me goditjen me thikë të njërit prej tyre.
Gjatë konfliktit, 14-vjeçari me inicialet M.K. goditi katër herë me mjet prerës 15-vjeçarin, duke i shkaktuar plagë të rënda. I mituri i plagosur u dërgua në Spitalin Rajonal, ku ndodhet në gjendje të rëndë.
Autori i dyshuar u arrestua nga Policia e Durrësit. Ndaj 14-vjeçarit M.K. janë ngritur akuzat për “Plagosje e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
