Komentet pozitive të ardhura nga Evropa bëjnë që shanset tona për t’u bërë pjesë e unionit rriten dhe këtë e ka përforcuar edhe Komisioneri Evropian, Johanes Hahn.
Në një instervistë për Agjencinë Gjermane të Lajmeve (DPA), Hahn ka thënë se është i bindur se në fund të muajit maj KE do të paraqes rekomandim pozitiv për vendin tonë dhe Maqedoninë e Veriut.
“Shqipëria ka bërë progres shumë të mirë në raport me kriteret e pranuara nga shtetet anëtare. Reforma gjithëpërfshirëse në Drejtësi është ekzemplare. Për më tepër, pritshmëritë legjitime të shqiptarëve duhet të vlerësohen nga shtetet e BE-së. Megjithatë, për shembull, përpjekjet për të luftuar korrupsionin dhe krimin e organizuar, në sektorë që shqetësojnë veçanërisht shtetet anëtare, duhet të rriten”, vazhdoi Hahn i pyetur nëse Shqipëria do të marrë sërish rekomandim pozitiv.
Mirëpo sigurisht që është e rëndësishme të dimë nëse vendet anëtare të BE-së do ta respektojnë rekomandimin që KE do të dërgojë dhe për këtë Hahn ka thënë një frazë shumë të qartë
“Nëse BE-ja nuk eksporton vazhdimisht stabilitet tek fqinjët tanë të afërt, atëherë do të importojë destabilitet”, ishin fjalët e tij.
Mirëpo çfarë pasojash mund të kenë vendet kandidate sipas Komisionerit në rast se nuk çelen negociatat?
“Shtyrja dhe mosnjohja e progresit objektiv të bërë nga vendet kandidate do të ketë pasoja dramatike për këto vende dhe rajonin në tërësi”, ka theksuar Hahn duke i dhënë kështu një pasqyrë të asaj çfarë mund të ndodhë.
