Lideri i Partisë Demokratike, Sali Berisha, ka kritikuar ashpër qeverinë dhe bashkinë për ndërhyrjen e tyre në procesin gjyqësor ndaj Erion Veliajt.
Para gazetarëve dhe të pranishmëve para SPAK-ut, Berisha e ka cilësuar këtë akt si një grusht shteti të vërtetë.
Ai theksoi se qeveria ka kapur drejtësinë dhe ka ushtruar një presion të paprecedentë ndaj gjykatësve dhe prokurorëve.
Berisha krahasoi këtë situatë me periudhën e Eskobarit dhe e quajti Edi Ramën një version modern të tij.
Por unë sot do të dënoj me forcën më të madhe aktin puçist, banditesk të narkoqeverisë dhe narkobashkisë Rama, të cilët morën peng për orë të tëra gjykatës dhe prokurorë të çështjes Veliaj.
Rikthyen në Tiranë skenat e viteve ’80, kur Eskobari sulmoi gjykatën dhe aty pati viktima të tëra.
Pas 40 e sa vitesh, Ediskobari kreu të njëjtin akt ndaj gjykatës dhe prokurorisë.
Në historinë e botës ka pra vetëm dy raste, ka rastin Eskobar dhe rastin Ediskobar.
Në historinë e botës ka me qindra raste protestash opozitare apo grupe interesi para gjykatave dhe prokurorive në çdo kryeqytet të botës.
Por protestë shtetërore, protestë e organeve shtetërore, ajo përbën një grusht shteti brenda shtetit.
Dhe e garantoj Edi Ramën dhe Erion Veliajn se ky krim antikushtetues do u regjistrohet atyre dhe do ndëshkohen në mënyrë shembullore që kujt të mos i shkojë mendja në pushtet të sulmojë pushtetin tjetër, tha Berisha.
