Tiranë– Rastet e personave të prekur nga lija e dhenve dhe të sëmundjes së zjarrit të natës janë shtuar.
Kështu, në këtë fillim viti në ‘Urgjencën e Infektivit’ janë paraqitur mesatarisht tri qytetarë në ditë të prekur nga virusi i lijës së dhenve dhe të sëmundjes së zjarrit të natës.
Në një intervistë për RTV Ora, shefja e ‘Shërbimit të Infektivit’, Najada Çomo, tha se vihet re një tendencë rritëse e këtyre sëmundjeve.
Najada Çomo: Kur ke 2 apo 3 do të thotë që numri është më i madh për arsye se të paktën lija e dhënëve është infeksion që përhapet nga njeriu te njeriu. Ndërsa zjarri i natës nuk përhapet. Një pjesë marrin mjekim dhe mjekohen në kushte shtëpie.
Nga ana tjetër, temperaturat e ulëta, kanë shtuar edhe rastet e gripit.
Sipas mjekes, në urgjencë paraqiten rreth 80 persona në dite.
Çomo u bën thirrje qytetarëve të bëjnë kujdes, pasi temperaturat e ulëta favorizojnë dhe prekjen nga gripi.
Najada Çomo: Janë dhe personat që kanë sëmundshmëri kronike që janë më vurnerabël për tu sëmurur nga infeksione të ndryshme, siç janë ato respiratore apo infeksione të sistemit nervor qendror, siç janë meningitet apo encefalitet për arsye se nuk janë sëmundje të lehta.
Çomo shprehet se janari pritet të sjellë një numër më të lartë të të infektuarve me grip, teksa këshillon qytetarët që të shmangin kontaktet me personat e sëmurë.
