Menjëherë pas humbjes në zgjedhjet e 6 marsit nënkryetarja demokrate Grida Duma pasi kërkoi me këmbëngulje dorëheqjen e Bashës, ka ashpërsuar edhe më tepër gjuhën dhe ka shtuar akuzat ndaj tij duke e akuzuar se po keqpërdor institucionet e partisë dhe se refuzonte kategorikisht të denonconte ‘aferën e Portit të Durrësit’.
Gjithashtu Duma e akuzoi se në Durrës ai vendosi njerëz që i shërbenin interesave të tij dhe jo kandidatit për kryetar bashkie. Akuzave që erdhën sot ndaj saj në mbledhjen e Bashës me krerët e degëve të PD dhe kandidatët në zgjedhje, Duma i ka cilësuar si ” topa pështynë nga frëngjitë e betejave ‘të pahumbura'”. Teksa e cilësoi Bashën të frikësuar që po prodhon gënjeshtra, Duma i kujton se ai nuk e ka pyetur atë si drejtuese politike në Durrës dhe ia ka bërë të qartë që në fillim të fushatës se beteja në Durrës ishte e “lëshuar” nga ana e PD.
“Lulzim Bashës që prej 24 orësh është frikësuar aq shumë sa angazhohet me topa pështynë nga frëngjitë e betejave “të pahumbura” po i bëj të qartë vetëm një pjesë të gjësë. Lulzim, keqpërdorimi që i bën zyrës së shtypit të PD-së ku jam nënkryetare Partie dhe keqpërdorimi që po i bën institucioneve të partisë duke futur njerëz si ish kandidati i i “Librës” që e emërove në Durrës pa më pyetur mua si Drejtuese Politike apo dhe përfaqësuesit e kompanisë së PR-it që i nise për t’i shërbyer vetëm vetes tende dhe jo kandidatit, janë vetëm një pjesëz e keqpërdorimit të Partisë Demokratike.T’i kam shkruar këto gjatë fushatës me dyshimin e plotë që me këto veprime gara ishte e “lëshuar”.
Meqë ra fjala dhe ky kandidati i Librës qe e vure shef shtabi dhe i gjithë shtabi të kërkoi për tre jave me rradhë të vije ne Durres dhe të denoncoje aferen e Portit të Durrësit- e refuzove në mënyrë kategorike!Po keqpërdor prapë sot rëndë atë që ke marrë nga demokratët me pa të drejtë. Siç po mashtron me kandidatin e Rrogozhines duke i vene sikur ka thene gënjeshtrat që ti prodhon ty ankthi.Lulzim, nuk është mburrje, po të isha si ti do ta kisha thënë me të madhe qē zona ku jam deputete është e vetmja ku Partia Demokratike doli forcë e dytë. Por nuk e them dot as këtë si vlerë se me dhimbsen demokratet, që kudo ku shkoja me thoshin “aman ç’ju lidh me atë”! Lulzim pas hirit të betejave të pahumbura nuk lulzojnë dot as shkurret e fitimeve me sakrificat e njerezve”, shkruan Duma në status në ‘facebook’.
