Pasi Grida Duma zyrtarizoi dorëheqjen e saj nga mandati i deputetes, rrjedhimisht sipas Kodit Zgjedhor mandati i transferohet Oriela Nebiajt.
Ditën e sotme, Nebiaj ka konfirmuar për “Panorama” se do të pranojë mandatin e deputetes në një kohë ku aktualisht është moderatore e emisionit të dashurisë, “Për’puthen” në “Top Channel”.
Theksojmë se Nebiaj kandidoi më 25 prill në qarkun e Tiranës, ku mori 5606 vota preferenciale. Nebiaj ishte renditur e 18 në listën e PD-së në qarkun e Tiranës, por pas rirenditjes në bazë të votave preferenciale ajo u ngjit një vend më sipër. Megjithatë, para saj në radhë ishte Petrit Doda, por me ndryshimet e fundit të Kodit Zgjedhor, mandatin e ligjvënësit që lë një grua e merr po një grua. Pas aktit të znj. Duma, pritet të mblidhet Këshilli i Mandateve në Kuvend për të shpallur vakancën. Vakanca i dërgohet Komisionit Qendror të Zgjedhjeve, i cili brenda 48 orëve bën zëvendësimin.
Ori Nebiaj prej vitesh është angazhur në politikë, përkatësisht nën siglën e PD-së por më në fund tashmë do ta shikojmë si deputete në Parlamentin Shqiptar. Grida Duma dha dje dorëheqjen nga mandati i saj si deputete, ku për herë të parë tregoi pengun e saj me politikën. Ajo tha se “goditja që më bënin mua nën brez, godiste pandërprerë më thellë, më shumë shpirtërisht, tim bir”.
