Dhjetë grevistë vijojnë të jenë të ngujuar brenda uzinës së Ballshit, ndërsa gjendja e tyre shëndetësore po rëndohet.
Në ditën e tyre të 13-të të grevës së urisë, naftëtarët e Ballshit nuk kanë një reagim nga qeveria. Ata kërkojnë pagat e pamarra prej disa muajsh dhe rifillimin e punës.
Ndërkohë vazhdon protesta në hyrje të portës së uzinës. Ata kanë vendosur pankartë ku shkruhet: “Uzina e jona, duam lekët tona”. Ata kërkojnë zgjidhjen e problemit të tyre që ka të bëjë me pagat e prapambetura dhe rikthimin e punës në rafineri.
Kreu i sindikatës Sokol Dautaj ka pasur luhatje të tensionit duke e detyruar të shkojë drejt spitalit me mjete private, pa pranuar ndihmën e stafit mjekësor në mjediset e grevës.
Naftëtarët prej disa muajsh protestonin për të marrë pagat e tyre, por zëri i tyre nuk është dëgjuar dhe kështu morën aktin ekstrem. Pas mbylljes së rafinerisë që administrohet nga “Tosk Energji”, janë më shumë se 800 punëtorë që kanë mbetur pa punë.
Disa jave më parë ata protestuan edhe para Ministrisë së Infrastrukturës dhe Energjisë, dhe kërkuan takim me ministren Balluku, por kjo e fundit nuk i priti në zyrë. Kështu që ata vendosën që të nisnin grevën brenda ambienteve të rafinerisë.
/Gazeta Reforma/
