Nuk kanë marrë një zgjidhje ende nga qeveria dhe duket se janë të vendosur që ta vazhdojnë sakrificën e tyre, që tashmë ka hyrë në ditën e 12-të, dhe të ngujuara janë një grup grash punëtore të ish-uzinës.
Naftëtarët e Ballshit, po vazhdojnë kështu grevën e urisë, duke i kërkuar qeverisë “Rama” pagat e prapambetura dhe zgjidhjen për punën e tyre.
Gratë naftëtare shprehen se, nuk dalin nga greva, pa pasur një zgjidhje të çështjes.
“Nuk duam asgjë tjetër, duam gjakun tonë. Populli është uragan e duhet të reagojmë të gjithë. Presim që kryeministri të reagojë. Nuk dallim nga greva pa marrë zgjidhje”,- tha një naftëtare.
Kurse, një tjetër naftëtare deklaroi se, kryeministri Edi Rama, duhet të reagojë dhe t’i japë zgjidhje situatës së krijuar.
“Edi Rama të reagojë dhe t’i jepet zgjidhje situatës. Nuk dalim nga greva pa marrë atë që na takon. Kryeministri është mashtrues”,- deklaroi naftëtarja.
Por edhe pse kanë kaluar plot 12 ditë nga greva e grave, asnjë reagim pozitiv nga ana e qeverisë nuk duket, dhe kjo ngjan me një tjetër kosto elektorale që kabineti “Rama” duket se do ta marrë mbi vete.
Pagat e papaguara të naftëtarëve, janë vetëm një prej problemeve, pasi shteti në gjithë këtë histori ka edhe shumë andralla të tjera, që për t’i zgjidhur është shumë e vështirë.
/GazetaReforma.com/
