Fqinji ynë Jugor ka vendosur që të zgjasë edhe më tej masat e izolimit të vendit, për shkak se koronavirusi në vend nuk po arrihet që të vihet nën kontroll.
“Lock-down-i” që ishte parashikuar të hiqej më 30 nëntor, duhet se do të shtyhet pasi qeveria e Greqisë e ka marrë këtë masë për të frenuar rastet me koronavirus.
Zëdhënësi i qeverisë greke, Stelios Petsas, bën të ditur se, Greqia nuk do të rihapet ashtu siç ishte plani fillestar.
“Lock-down-i” total do të ketë shtyrje, pasi të dhënat epidemiologjike nuk e lejojnë rikthimin në normalitet.
Zëdhënësi i qeverisë theksoi se, do vazhdojë mbështetja e punëtorëve dhe biznesit, me 7.5 miliardë euro “të vendosura mënjanë” në buxhet, për përballimin e kësaj situate të zgjatur.
Për sa i përket hapjes së shkollave, vetëm komisioni i specialistëve të epidemiologjisë do të vendosë nëse dhe kur do kthehen nxënësit në shkollë, ku një datë të mundshme për shkollat fillore është 7 dhjetori.
Periudha festive në Greqi do të jetë ndryshe, pasi nuk do të lejohet qarkullimi nëpër qytete, do të ketë orar më të zgjatur ndalim qarkullimi.
Po ashtu, për Krishtlindje nuk do të hapen baret dhe restorantet, ndërsa ka shpresë të funksionojnë restorantet për pak orë në mbrëmje, gjatë festave.
/GazetaReforma.com/
