Ministrja e Shëndetësisë dhe Mbrojtjes Sociale, Ogerta Manastirliu me anë të një postimi në rrjetet sociale i ka shprehur mirënjohje Greqisë për mbështetjen e dhënë. Gjithashtu ministrja në postimin e saj shkruan se solidariteti me njëri-tjetrin na bën më të fortë. Mësohet se ditën e sotme kanë mbërritur në Tiranë 20 mijë doza vaksinash të cilat i ka dhuruar Greqia për vendin tonë. Më herët Greqia ka bërë me dije se do të dhuronte 40 mijë doza vaksinash për dy fqinjët e saj Shqipërinë dhe Maqedoninë e Veriut.
“20,000 doza të vaksinës AstraZeneca kanë mbërritur në Aeroportin “Nënë Tereza”, falë ndihmës së Greqisë për Shqipërinë. Mirënjohje qeverisë së Republikës së Greqisë për mbështetjen. Solidariteti na bën më të fortë. Do të vijojmë pa u ndalur me planin kombëtar të vaksinimit, për mbrojtjen e jetës dhe shëndetit të çdo qytetari.”, ka shkruar ministrja e Shëndetësisë, Ogerat Manastirliu në rrjetet sociale.
Kujtojmë që Shqipëria e ka nisur fushatën e vaksinimit në janar, me doza të Pfizer që u dhuruan nga një vend i Bashkimit Europian, emri i të cilit nuk u bë i ditur. Më pas në vend janë përdorur edhe vaksinat e AstraZeneca derisa në muajin mars qeveria i hapi rrugën përdorimit të vaksinave ruse Sputnik V dhe atyre kineze të Sinovac. Këto të fundit morën pak kohë më parë edhe dritën jeshile për përdorim emergjent nga Organizata Botërore e Shëndetësisë.
