Greqia do t’i dhurojë Shqipërisë 20 mijë doza të vaksinës anti-Covid. Lajmin e ka konfirmuar Ambasada e Shqipërisë në Athonë, ndërsa shkruan se sipas deklaratës së zëdhënëses së qeverisë greke, Greqia do t’i dhurojë dozat ashtu siç bën edhe shumica e vendeve europiane për fqinjët e tyre më të afërt. Detaje për datën në të cilën do të vijnë vaksinat dhe për llojin e tyre nuk janë bërë të ditura.
“Greqia i dhuron Shqipërisë 20 mijë vaksina
Sipas deklaratës zyrtare së zëdhënëses së qeverisë greke znj. Aristotelia Peloni, Greqia fqinje do t’i dhurojë Shqipërisë 20.000 doza të vaksinës kundër Covid-19, siç bëjnë shumica e vendeve evropiane për fqinjët e tyre të afërt.
Ecim përpara në bashkëpunimin mes dy vendeve dhe në projektet tona të përbashkëta.
Faleminderit”, thuhet në njoftimin e Ambasadës.
Kujtojmë që Shqipëria e ka nisur fushatën e vaksinimit në janar, me doza të Pfizer që u dhuruan nga një vend i Bashkimit Europian, emri i të cilit nuk u bë i ditur. Më pas në vend janë përdorur edhe vaksinat e AstraZeneca derisa në muajin mars qeveria i hapi rrugën përdorimit të vaksinave ruse Sputnik V dhe atyre kineze të Sinovac. Këto të fundit morën pak kohë më parë edhe dritën jeshile për përdorim emergjent nga Organizata Botërore e Shëndetësisë.
