Greqia prej ditësh ka qenë nën sundimin e flakëve, por mbrëmjen e djeshme pati një stuhi me breshër dhe shi të furishëm në shumë zona të vendit.
Moti i keq filloi pasditen e të mërkurës dhe arriti kulmin gjatë natës në Greqinë Veriore. Gjithashtu rrufet e rëna në zonën e Atikës ndezën disa vatra zjarri në gjashtë vende, të cilat u favorizuan edhe nga erërat e forta, por që u shuan shpejtë nga shirat e furishëm që pushtuan vendin. Po ashtu shirat kanë vazhduar edhe në orët e para të mëngjesit të së enjtes në Halkidi. Larisa u përmbyt pas reshjeve të dendura të shiut, ndërsa Kavala u godit nga një breshër i madh. Moti i keq ka prekur edhe Evian Veriore, ndërsa sipas shërbimet të motit të Observatorit Kombëtar të Athinës (NOA), Meteo.gr, reshjet e shiut ishin të parashikueshme në zonën veriore dhe në qendër të Egjeut, duke përfshirë edhe Evian ishullin që u shkatërrua nga zjarret katastrofike.
Gjithashtu sipas Meteo.gr temperaturat u zbutën duke filluar nga e mërkura pasdite dhe se Greqia tashmë mund të marri frymë lirisht pasi masat e ajrit të nxehtë do të largohen gradualisht nga rajoni. Gjithashtu Meteo ka paralajmëruar se në rajonet e shkatërruara nga zjarret duhet të ketë kujdes pasi ka rrezik për përmbytje. Moti pritet të përmirësohet të enjten pasdite.
