Situata në pikën kufitare të Qafë Botës vijon të jetë problematike, për shkak të vonesave të mëdha në kalim, kryesisht si pasojë e funksionimit të ngadaltë të palës greke.
Aktualisht, autoritetet greke po punojnë me vetëm një sportel, çka ka krijuar radhë të gjata automjetesh dhe pritje të zgjatura për qytetarët që udhëtojnë në të dy drejtimet, Shqipëri–Greqi dhe anasjelltas.
Mësohet se dogana greke po operon me një sens të vetëm qarkullimi për hyrje dhe dalje, duke e përkeqësuar situatën për të gjithë udhëtarët.
Gjatë paradites së së dielës, kanë kaluar kufirin rreth 1436 qytetarë shqiptarë dhe të huaj, si dhe 460 mjete.
Ndërkohë, pala shqiptare ka vendosur në funksion tre sportele për të lehtësuar fluksin, por për shkak të kufizimeve në krahun grek, kjo nuk ka rezultuar e mjaftueshme për të shmangur pritjet dhe bllokimet.
