Ai që u quajt si një nga të arrestuarit më të rëndësishëm, “Daja”, emri i të cilit është Ragip Hajdini, ka dalë ditën e sotme para gjykatës ku është njohur me masën e sigurisë “arrest me burg”. Mirëpo nuk mbaron me kaq, pasi Hajdini kërkon ballafaqim, pasi thotë se ai nuk është personi që policia është duke kërkuar.
Hajdini ka lidhje me familjen e Admir Muratjat, për më tepër ka qenë i pranishëm edhe në varrim, mirëpo ai ka thënë se nuk është “Daja”.
“Kam njohje me familjen Murataj. Isha në varrimin e Muratajt, kam njohje me vëllain e tij. Por nuk jam unë ‘daja’ që kërkoni. Kam dëgjuar në media që flitej për një ‘daja’, por po të kisha lidhje nuk rrija këtu. Kam pamjet filmike që nuk isha aty në ditën e grabitjes. Kam qenë duke drekuar me miq të mi”, është shprehur Hajdini.
Për më tepër ai ka kërkuar ballafaqim me Alkond Bengasin, personin që nxorri edhe emrin e tij, për ta verifikuar nëse është vërtet Hajdini ai për të cilin flet.
“Dua të ballafaqohem me Bengasin që më ka identifikuar”, ka thënë Hajdini.
