Para disa ditësh pika e postës Shqiptare në Kamëz përballë gjimnazit “Ibrahim Rugova” ra pre e një grabitje.
Në pranga përfundoi Algert Kurti, i cili bashkë me Elis Suçi, që është shpallur në kërkim vodhën nën kërcënimin e armës një shumë parash në filialin e Postës.
Gjykata e Tiranës ka dhënë sot masën e sigurisë për një prej bashkëpunëtorëve të grabitjes së Postës Shqiptare në Kamëz. Gjykata ka dhënë ndaj tij masën e arrestit me burg.
20-vjeçari ashtu sic ka deklaruar në dëshminë pak pas arrestimit, Kurti ka mohuat të ketë qenë i përfshirë në grabitje, duke pranuar se ideator dhe ekzekutues ka qenë Elis Suçi.
Pra, Kurti përjashton veten nga grabitja, edhe pse pranon se ka qenë në dijeni se Suçi do të bënte grabitje.
Ngjarja ndodhi pak ditë më parë ndërsa arritën të grabisnin 10 milionë lekë të vjetra.
“Falë veprimeve të shpejta dhe profesionale, zbardhet dhe dokumentohet në kohë rekord, ngjarja e ndodhur ditën e djeshme, në Kamzë. Identifikohet dhe vihet në pranga njëri nga autorët që dyshohet se vodhi nën kërcënimin e një arme, një shumë parash, në filialin e Postës Shqiptare. Shpallet në kërkim bashkautori tjetër. Sekuestrohen një aparat celular dhe veshjet që autorët dyshohet se i kanë përdorur gjatë kryerjes së krimit. Shërbimet e Komisariatit të Policisë Nr. 5, në Kamzë, pas marrjes së njoftimit për vjedhjen e një shume parash në filialin e një poste në Kamzë, menjëherë kanë organizuar punën me qëllim identifikimin dhe vënien para përgjegjësisë ligjore të autorëve”, thuhej ndër të tjera më herët në njoftimin e policisë së shtetit.
