Një grabitje me armë zjarri ndodhi një javë më parë në lagjen 4 të qytetit të Sarandës, në banesën e një noteri. Noteri Thoma Kaçi ishte duke dalë me gruan dhe djalin në mëngjes kur dëgjoi derën të hapej nga dy grabitësit e maskuar dhe të armatosur me kallashnikov. Ata i kanë detyruar që të futen brenda, i kanë lidhur në karrige dhe më pas u bënë presion për t’u treguar se ku i mbanin paratë.
Thoma Kaçi telefonoi policinë dhe ishin efektivët ata që më pas i zgjidhën nga karriget.. Grabitësit i kanë vjedhur familjes Kaçi 20 milionë lekë të vjetra.
Një javë më pas policia ka gjetur dhe sekuestruar armën e zjarrit tip automatik që është përdorur nga autorët. Arma është dërguar dërguar për ekzaminime të mëtejshme laboratorike në Institutin e Policisë Shkencore Tiranë, me qëllim identifikimin me prova shkencore të dy autorëve të ngjarjes.
Policia e Sarandës nën drejtimin e Prokurorisë po vijon punën për kapjen e grabitësve që terrorizuan familjen Kaçi
NJOFTIMI ZYRTAR
Specialistët për Hetimin e Krimeve në Komisariatin e Policisë Sarandë, në bashkëpunim me strukturat hetimore të DVP Vlorë, pas një pune intensive hetimore për zbardhjen e ngjarjes së ndodhur më datë 20.10.2021, në lagjen nr.1, Sarandë, ku dy persona të paidentifikuar kanë hyrë në banesën e shtetasit T. K. dhe nën kërcënimin e armës i kanë vjedhur një shumë të konsiderueshme parash në lekë dhe euro, kanë bërë të mundur gjetjen dhe sekuestrimin e armës së zjarrit automatik që dyshohet se është përdorur në këtë ngjarje, si dhe një sasi municioni luftarak.
Arma e zjarrit është dërguar për ekzaminime të mëtejshme laboratorike në Institutin e Policisë Shkencore Tiranë, me qëllim identifikimin me prova shkencore të dy autorëve të ngjarjes.
Nën drejtimin e Prokurorisë, shërbimet e Komisariatit të Policisë Sarandë po vijojnë punën për identifikimin dhe kapjen e autorëve të ngjarjes.
Materialet shtesë iu referuan Prokurorisë së Rrethit Gjyqësor Sarandë, për veprime të mëtejshme.
