Prokuroria e Beratit ka kërkuar ish-ministrin e Brendshëm Bledi Çuçi. Ish-ministri kërkohet për të dhënë shpjegime nën cilësinë e një personi që ka dijeni për një çështje që ka lidhje me Kombinatin Mekanik të Poliçanit. Dosja është hapur që në vitin 2022 për veprën penale të shpërdorimit të detyrës. Sipas “BW”, kreu i grupit parlamentar të Partisë Socialiste kërkohet që të dëshmojë para prokurorit Eni Çulli më 15 korrik, ora 12.00.
Fletëthirrja është dërguar për zbatim komisariatit nr.3 në Tiranë.
Çështja penale lidhet me vjedhjen e 54 ton metal në Kombinatin Mekanik të Poliçanit dhe Çuçi thirret në cilësinë e drejtuesit politik të qarkut Berat pasi nga hetimet ka rezultuar se ka patur komunikime me drejtorin e Kombinatit, Erion Zylyftari, i cili është njëherazi edhe kreu i Partisë Socialiste në Poliçan. Po ashtu, përveç ish-ministrit Çuçi, pritet që do të thirret për të dëshmuar edhe ministri i Mbrojtjes, Niko Peleshi. Kjo për shkak se Kombinati është pronë e institucionit që ai drejton.
Aktualisht hetimi po kryhet në Prokurorinë e Beratit, por nëse do të ketë gjetje të tjera nga marrja në pyetje, ky organ mund të shpallë moskompetencë dhe çështja t’i kalojë Strukturës së Posaçme kundër Korrupsionit dhe Krimit të Organizuar.
Kombinati Mekanik Poliçan është një ndërmarrje shtetërore, e themeluar në vitin 1962, me qëllim përmbushjen e kërkesave të Forcave të Armatosura Shqiptare për armatim. Kombinati ndodhet pranë qytetit të Poliçanit, në rrethin e Skraparit, 22 km në jug të qytetit të Beratit. Uzina e Prodhimit të Municioneve (sot Kombinati Mekanik Poliçan), u ndërtua dhe filloi aktivitetin e saj në vitet 60–të.
