Grabitja spektakolare që tronditi Muzeun e Luvrit në Paris po rezulton të ketë një kosto marramendëse për trashëgiminë kulturore franceze. Bizhuteritë e rralla të Napoleon Bonapartit dhe Perandoreshës Joséphine, të vjedhura gjatë sulmit, vlerësohen në rreth 88 milionë euro. Përveç pasurisë materiale, prokurorja Laura Beccuau theksoi se objektet kanë një rëndësi të jashtëzakonshme historike, duke e përshkruar humbjen si një dëm të pallogaritshëm për historinë dhe kulturën franceze.
Në kuadër të hetimeve ndërkombëtare, autoritetet spanjolle kanë arrestuar në Barcelonë një shtetase kineze, e dyshuar si pjesë e grupit të përfshirë në grabitjen e Luvrit. Ajo është dorëzuar tashmë në duart e policisë franceze dhe dyshohet gjithashtu për lidhje me një tjetër vjedhje të rëndë në Muzeun e Historisë Natyrore, ku në shtator të vitit të kaluar u morën copëza ari me vlerë 1.5 milionë euro.
Sipas BFM, zbulimi i grabitjes u bë rastësisht nga një punonjës i kompanisë së pastrimit, i cili gjeti në rrëmujë galerinë mineralogjike. Hetimet tregojnë se autorët kanë përfituar nga një periudhë kur sistemi i alarmit ishte çaktivizuar për shkak të një sulmi kibernetik. Seksioni i Gjeologjisë dhe Mineralogjisë kishte qenë i mbyllur prej ditësh, gjë që lehtësoi hyrjen e hajdutëve dhe ekzekutimin e grabitjes që tashmë cilësohet si një nga më të bujshmet në historinë moderne të muzeve evropiane.
