Një grabitje me armë është regjistruar mesditën e sotme në një filial të OTP Bank në rrugën “Gjin Bue Shpata”, pranë stadiumit “Dinamo” në Tiranë.
Sipas informacioneve paraprake, një person i veshur me të zeza dhe i maskuar ka hyrë në ambientet e bankës dhe, nën kërcënimin e një sendi në dukje armë zjarri, ka arritur të marrë një shumë parash. Burime bëjnë me dije se paratë dyshohet se i janë marrë një qytetari që sapo po kryente një depozitë në bankë.
Pas grabitjes, autori është larguar nga vendngjarja me një skuter, ndërsa policia ka nisur menjëherë operacionin për kapjen e tij. Në disa zona të kryeqytetit janë ngritur pika kontrolli dhe janë angazhuar shërbime të shumta policore për identifikimin e autorit.
Policia e Tiranës konfirmoi ngjarjen përmes një njoftimi zyrtar, ku bëhet me dije se rreth orës 12:26 një person i maskuar hyri në filialin bankar dhe mori një shumë parash nën kërcënim.
“Rreth orës 12:26, në rrugën ‘Gjin Bue Shpata’, një shtetas i maskuar ka hyrë në ambientet e një banke dhe, dyshohet se në kërcënimin e një sendi në dukje armë, ka marrë një shumë parash. Menjëherë pas marrjes së njoftimit, janë ngritur pika kontrolli dhe janë orientuar të gjitha shërbimet policore, për identifikimin dhe kapjen e autorit. Grupi hetimor po punon për identifikimin e autorit dhe dokumentimin e rastit”, thuhet në njoftim.
Hetimet vijojnë për identifikimin e grabitësit, zbardhjen e plotë të ngjarjes dhe përcaktimin e shumës së parave që u morën gjatë grabitjes.
