KORÇË
Policia e Korçës ka arrestuar dy persona në qytetin jug-lindor, R. M., 20 vjeç dhe E. B., 25 vjeç, pasi akuzohen se kanë grabitur e dhunuar 4 emigrantë nga vendet e Lindjes.
Sipas policisë, dy autorët iu kanë marrë emigrantëve 500 euro, si dhe e kanë goditur me thikë një prej refugjatëve.
Emigranti nga vendet e Lindjes është shtruar menjëherë në Spitalin e Korçës, ku po merr mjekimin e nevojshëm.
Dy të arrestuarit janë persona problematikë, të skeduar më parë për akuzën e vjedhjes.
Njoftimi i Policisë së Korçës:
Zbardhet dhe dokumentohet ngjarja e ndodhur më datë 02.08.2020, ku u vodhën me dhunë 4 emigrantë të paligjshëm dhe u plagos me mjet prerës njëri prej tyre. Ndalohen nga Policia, dy autorët e dyshuar të ngjarjes.
Specialistët për Hetimin e Krimeve në Komisariatin e Policisë Korçë, në vijim të punës hetimore për zbardhjen dhe dokumentimin e ngjarjes së ndodhur më datë 02.08.2020, bënë ndalimin e shtetasve të shpallur në kërkim:
- R. M., 20 vjeç, banues në fshatin Moravë, Korçë, (i dënuar më parë për “Vjedhje”).
- E. B., 25 vjeç, banues në Vlorë, (i dënuar më parë për “Vjedhje”).
Ndalimi i tyre u bë pasi, nga verifikimet e kryera rezulton se këta shtetas në bashkëpunim me njëri-tjetrin, iu kanë dhënë ndihmë për kalim të paligjshëm të kufirit 4 shtetasve të huaj, të cilët pasi i kanë marrë në një automjet, në afërsi të fshatit Drenovë, iu kanë vjedhur me dhunë 500 euro, si edhe kanë goditur me mjet prerës njërin prej tyre i cili mori mjekimin e nevojshëm pranë Spitalit Rajonal Korçë.
Materialet i kaluan Prokurorisë pranë Gjykatës së Shkallës së Parë Korçë për veprat penale “Vjedhja me dhunë” dhe “Ndihma për kalim të paligjshëm të kufirit” të kryera në bashkëpunim.
