Një “gomar i pabindur” është bërë shkak i një sherri banal mes dy vëllezërve në fshatin Shpatë të Baldushkut në Tiranë.
BalkanWeb raporton se Enver Lloçi ka akuzuar vëllain e tij Muharremin se gomari i tij kishte hyrë në vresht duke i dëmtuar rrushin, por pasi nuk janë marrë vesh Enveri ka përdorur edhe fjalë banale në drejtim të vëllait, çka ka bërë që ky ta godasë fillimisht me një copë druri, gjë që i ka shkaktuar dëmtime të rënda në fytyrë.
Muharremi është rrëzuar në tokë pa ndjenja dhe në këto momente ka ndërhyrë djali i Muharremit, Bujar Lloçi i cili ka goditur me leva hekuri xhaxhain e tij.
Një ditë më pas, policia ka marrë njoftimin nga vetë Muharremi, për sherrin mes dy vëllezërve dhe i ka shoqëruar të dy në polici, ndërsa ka shpallur në kërkim, Bujarin, djalin e Muharremit.
“Ndodhesha pranë vreshtit të rrushit kur pashë gomarin e Enverit që kishte hyrë dhe po dëmtonte rrushin. E nxora gomarin nga vreshti dhe e ndoqa deri tek shtëpia e Enverit dhe i tregova ca kisht ndodhur. Por Enveri nisi të shante dhe të ofendonte me fjalë shumë fyese e banale në drejtimin tim, të gruas sime dhe të vajzave. U afruan pranë meje me gjithë gruan dhe më tërhoqën nga rrobat. Më pas Enveri më goditi me një copë druri të shkurtër. Ndërkohë u afruan dhe dy fëmijët e vëllait të cilët po më shtynin për të më rrëzuar në tokë. Ngrita duart para duke u munduar të mbroja kokën por kur më goditi me dru më çau në fytyrë. Më pas më qëlloi me grusht në anën e majtë të hundës pranë syrit. Kam rënë në tokë dhe nuk mbaj mend më asgjë,”– ka deklaruar në kallëzimin e tij Muharremi.
Nga ana tjetër Enver Lloçi, i arrestuar për dhunë në familje ka deklaruar se ai është dhunuar fizikisht nga djali i vëllait të tij, nga nipi i quajtur Bujar Lloçi, i cili është shpallur në kërkim.
