Gjykata e Posaçme në Tiranë vendosi të dielën që të lërë në burg Ervis Çelën, një nga drejtuesit kryesorë të organizatës kriminale që solli në Evropë 28 tonë kokainë në vetëm dy ngarkesa të mëdha nga Amerika Latine.
Ai vepronte së bashku me Franc Çopjan, i cili ndodhet aktualisht i arrestuar në Belgjikë.
Pas një seance të gjatë, Gjykata konfirmoi masën e arrestit me burg për edhe 6 persona të tjerë të arrestuar, përfshirë Albin Çelën, i njohur edhe si Defrim Çela, Petrit Lakatos (alias Petrit Sulejmani), Renato Musaku, Gert Çerma, Marenglen Kamami dhe Elidon Çela. Ndërsa Riza Çela, një tjetër i përfshirë në këtë grup, është liruar me masën e arrestit shtëpiak.
Gjithashtu, dy shoferë autobusësh, Kujtim Gjyla dhe Ditjon Pepa, u vu nën masën e detyrimit për paraqitje në autoritete. Ndërkohë, për pesë persona të tjerë është shpallur në kërkim.
SPAK nisi të premten një operacion në disa qytete kryesore si Elbasan, Tiranë, Durrës dhe Lushnjë, ku zbatoi 16 masa sigurie, përfshirë 14 arrestime me burg dhe 2 masa detyrim paraqitjeje, duke goditur kështu organizatën kriminale të familjes Çopja.
Prokuroria e Posaçme e ka identifikuar Franc Çopjan dhe Ervis Çelën si kreu i organizatës, e cila operonte në një shkallë ndërkombëtare. Ata bashkëpunonin me grupe të tjera kriminale për të lehtësuar transportet e kokainës drejt porteve në Evropë dhe investonin fitimet e mëdha në prona dhe biznese brenda dhe jashtë Shqipërisë.
Sipas SPAK, paratë e fituara shpërndaheshin përmes autobuseve, si dhe përmes sistemeve informale të transfertave financiare të njohura si “hawala” apo “token”.
Organizata trafikonte dy ngarkesa të mëdha kokainë në vitin 2020: një në shtator, me 11.6 tonë nga Paraguai drejt Belgjikës, dhe një tjetër në dhjetor, me 16.4 tonë nga Amerika Latine drejt Gjermanisë. Vlera e vetëm ngarkesës së dytë llogaritet të jetë midis 1.5 dhe 3.5 miliardë euro, e cila u sekuestrua nga autoritetet doganore gjermane.
Ngarkesat e mëdha siguroheshin drejtpërdrejt nga Ervis Çelaj dhe vëllai i tij Ardian Çelaj, të dy banues në vendet e Amerikës Latine.
Gjykata vendosi gjithashtu sekuestrimin preventiv të 14 pasurive me vlerë disa milionë euro, që përfshijnë resorte, vila, apartamente, trualla, automjete dhe kuota në shoqëri.
Ndër to përfshihet edhe “Ajman PARK” Resort në Xhafzotaj të Durrësit, ku ndodhen hotele, godina shërbimi, restorante dhe ambiente tregtare, si dhe një vilë luksoze dy katëshe në bregdetin e Dhërmiut, tip “ELYSIAN”, me vlerë rreth 1 milion euro.
Këto prona janë në emër të Julian alias Hysni Balla, aktualisht president i klubit të futbollit Erzeni, ndaj të cilit ka një urdhër arresti por që është ende në kërkim.
