Policia e Fierit ka ndaluar një shtetas të shpallur në kërkim në lidhje me një sulm të ndodhur më 11 mars 2025 ndaj një punonjësi të Institucionit të Ekzekutimit të Vendimeve Penale Fier.
I arrestuari është M. P., 32 vjeç, banues në Patos, me precedent penal për vrasje dhe armëmbajtje pa leje.
Sipas hetimeve, ai dyshohet se, në bashkëpunim me tre persona të tjerë, ka goditur me grushte punonjësin e IEVP-së, për shkak të detyrës së këtij të fundit.
Për këtë sulm, Gjykata e Fierit ka vendosur ndaj M. P. masën e sigurisë “arrest në burg”, nën akuzën e “Goditjes për shkak të detyrës”, e kryer në bashkëpunim.
Policia vijon punën për kapjen e tre bashkëpunëtorëve të tij: A. M., E. N. dhe E. R., të cilët ndodhen ende në kërkim. Materialet i janë referuar Prokurorisë së Fierit për veprime të mëtejshme ligjore.
