Babai i futbollistit shqiptar, Cristian Shpendi që luan në serinë C në skuadrën italiane, Cesena është bërë protagonist i një ngjarjeje aspak të këndshme.
Dje ai ka hyrë në fushë pas mbarimit të ndeshjes mes Cesenës dhe Olbias, duke goditur me grusht u portierin e Olbias, Filippo Rinaldi, pasi ai kishte dëmtuar në kokë lojtarin shqiptar.
Liman Shpendi nuk mundi t’i përmbante nervat dhe kreu këtë akt aspak të këndshëm. Por, kjo ngjarje nuk mund të kalonte kaq lehtë nga autoritetet e futbollit italian.
Mediat italiane shkruajnë se është marrë vendimi që babai i futbollistit 20-vjeçar të mos i lejohet hyrja në stadiume për 1 vit. Lajmin e ka bërë të ditur vetë ekipi ku luan djali i tij, ndërkohë thuhet se Cesena mund të marrë edhe një gjobë.
“Cesena FC, duke iu referuar episodit të ndodhur dje, me rastin e ndeshjes Cesena-Olbia, dënon me vendosmëri sjelljen e familjarit, duke dënuar dhe shkëputur veten nga çdo formë dhune dhe çdo sjellje josportive që nuk ka të bëjë fare me parimet e besnikërisë dhe lojës së ndershme që e kanë dalluar gjithmonë klubin”, shkruhet në reagimin publik të ekipit italian.
Ndërkohë nga ana tjetër, Liman Shpendi ka deklaruar publikisht se ky gjest ka qenë i turpshëm dhe se nuk mund të justifikohet.
“Jam i mërzitur nga shembulli i keq që dhashë me gjestin që bëra dje. E di, si një familjar që gjithmonë është përpjekur të edukojë fëmijët mbi vlerat e respektit për të tjerët, se ky gjest nuk mund të justifikohet.
Ishte, për fat të keq, një moment dobësie, që më bëri që pasi pashë djalin tim të gjakosur të bëj një gabim të rëndë. Unë dua t’u kërkoj falje të gjithëve, sepse e di që me sjelljen time kam thyer ato vlera që besoj dhe që jam përpjekur gjithmonë t’i përcjell te familja ime”, është shprehur ai.
