Protesta e opozitës ka nisur me një ngjarje të dhunshme ku shënjestra ka qenë vetë kreu i Partisë Demokratike, Sali Berisha.
Ish-kryeministri Berisha u godit me grusht fytyrës në momentin që po shkonte nga selia e PD-së për në bulevardin Dëshmorët e Kombit ku po zhvillohet protesta e opozitës.
31-vjeçari Gert Shehu ka arritur t’i shpëtojë truprojave dhe i është afruar me shpejtësi kreut të PD-së Sali Berisha duke e goditur me grusht në fytyrë.
Me qëllim të qartë 31-vjeçari nga Tepelena i identifikuar si Gert Shehu, shihet teksa bën grushtet gati pa hyrë mes turmës, më pas çan protestuesit dhe qëllon Berishën.
Bëhet e ditur se agresori 31-vjeçar është më origjinë nga Tepelena dhe banon në Tiranë.
Pasi është neutralizuar, personi në fjali i identifikuar si Gert Shehu është marrë menjëherë për në selinë blu. Aty ka mbërritur edhe një ambulancë. Më pas ka ardhur policia të cilët kanë arrestuar agresorin që goditi Berishën.
Ende nuk dihet se pse ky person ka sulmuar Sali Berishën, por raportohet se ai ka qenë pjesë e turmës dhe më pas i ka dalë para liderit të PD-së dhe e ka qëlluar me grusht në fytyrë. Raportohet se Sali Berisha ka pasur gjakderdhje në fytyrë për shkak të goditjes së fortë nga personi në fjalë.
