SPAK, në bashkëpunim me autoritetet italiane, ka sekuestruar pasuri me vlerë rreth 4 milionë euro që i përkisnin një organizate kriminale të drejtuar nga Suel Çela dhe që operonte në Elbasan dhe Verona.
Në kuadër të këtij operacioni janë bllokuar një ndërtesë në Nogarole Rocca (Verona), një kompleks i ndërtuar me 30 zyra dhe dyqane në vlerë rreth 3 milionë euro po në Verona, një llogari bankare ku depozitoheshin qiratë e këtyre ambienteve (rreth 400 mijë euro në vit) dhe një shoqëri ndërtimi me pronësi 100% në Itali.
Hetimet e përbashkëta të Prokurorisë së Posaçme, Byrosë Kombëtare të Hetimit dhe Guardia di Finanza në Verona zbuluan se këto pasuri janë financuar me të ardhura të përfituara nga trafiku ndërkombëtar i kokainës, që transportohej nga Amerika e Jugut drejt tregjeve evropiane.
Skema financiare funksiononte përmes transferimit të fondeve nga Shqipëria në Itali, ku një shoqëri e pasurive të paluajtshme në Itali merrte shuma të mëdha parash nga një kompani shqiptare në pronësi të dy vëllezërve, Suel dhe Marjo Çela.
Këto para investoheshin në ndërtim dhe rikonstruksion të ndërtesave në Itali, të cilat më pas jepeshin me qira, duke legalizuar përfitimet e aktivitetit kriminal.
Njëri prej vëllezërve është shpallur në kërkim ndërkombëtar, ndërsa tjetri u arrestua në qershor të 2024 në Verona, pas një urdhër-arresti të lëshuar nga autoritetet belge për dyshimet e përfshirjes në një vrasje mafioze në Antwerp.
Ky i fundit përballet me akuza të rënda si “vrasje me paramendim”, “mbajtje dhe prodhim pa leje të armëve”, “trafik ndërkombëtar droge” dhe “pastrim parash”.
Hetimet treguan se investimet në Itali përbënin fazën përfundimtare të pastrimit të parave të ardhura nga aktiviteti kriminal, ku përmes transaksioneve të dyshimta në Shqipëri synohej fshehja e origjinës së këtyre fondeve.
Në këtë operacion u sekuestruan edhe pasuri dhe burime financiare që i përkisnin administratorëve shqiptarë të një shoqërie ndërtimi në Verona, të cilët konsideroheshin bashkëpunëtorë të ngushtë të vëllezërve dhe përfshiheshin në listat e pagesave të organizatës kriminale.
Kontrolle të mëtejshme u kryen ndaj ndihmësve dhe subjekteve italiane të përfshira në rrjet, me qëllim mbledhjen e provave shtesë.
Ky operacion është i pari i këtij lloji nga Prokuroria e Veronës që dokumenton investimin e organizatave kriminale shqiptare në pasuri të paluajtshme në territorin e Bashkimit Europian. Hetimet janë ende në fazë paraprake.
