Një rrjet prostitucioni është zbuluar dhe goditur nga Policia e Durrësit, në kuadër të operacionit të koduar “Space”. Sipas njoftimit zyrtar, si rezultat i hetimeve intensive është arrestuar një shtetas turk, I. Y., 37 vjeç, i dyshuar si organizatori i veprimtarisë kriminale.
Hetimet kanë zbuluar se ky shtetas kishte rekrutuar tre shtetase kineze për të ushtruar prostitucion në një apartament të marrë me qira në lagjen nr. 13 të qytetit të Durrësit. Apartamenti ishte përshtatur enkas për zhvillimin e kësaj veprimtarie.
Ndërhyrja e shërbimeve të Komisariatit të Policisë Nr. 2 në Tiranë çoi në ndalimin e shtetasit turk, ndërsa gjatë kontrollit u sekuestruan edhe tre celularë në posedim të tij. Në pranga përfunduan gjithashtu edhe tre shtetaset kineze, të cilat akuzohen për ushtrim prostitucioni.
“Si rezultat i hetimeve të kryera në kuadër të këtij operacioni, me qëllim nxjerrjen përpara përgjegjësisë penale të të gjithë shtetasve të implikuar në një rast të përshtatjes së apartamenteve, për ushtrim të prostitucionit, strukturat hetimore të Drejtorisë Vendore të Policisë Durrës, në drejtimin e Prokurorisë, identifikuan organizatorin e dyshuar të kësaj veprimtarie kriminale, shtetasin turk I. Y., 37 vjeç, i cili u kap nga shërbimet e Komisariatit të Policisë Nr. 2, Tiranë,” thuhet në njoftimin zyrtar të policisë.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme hetimore dhe ndjekje penale ndaj të gjithë personave të përfshirë.
