Policia greke ka zhvilluar një operacion të gjerë antidrogë në jug të vendit, duke goditur një rrjet të organizuar kriminal që trafikonte kokainë nga Amerika Latine drejt Evropës.
Në kuadër të operacionit, është bastisur një banesë e cila ishte përshtatur si laborator për nxjerrjen e lëndës narkotike nga lëkurat e gjedhëve të importuara me paleta nga jashtë.
Hetimet zbuluan se grupi kriminal kishte krijuar një skemë të sofistikuar kontrabande, duke përdorur metoda të avancuara për përpunimin e materialeve dhe izolimin e kokainës.
Më pas, droga trafikohej brenda territorit grek dhe jashtë tij.
Deri tani, janë arrestuar gjashtë persona, përfshirë shtetas grekë dhe shqiptarë. Ndërkohë, operacioni vijon dhe autoritetet janë në kërkim të të tjerëve që dyshohet se janë pjesë e këtij rrjeti ndërkombëtar trafiku.
