Kryetari i VMRO-DPMNE-së, Hristjan Mickoski, u takua me ish-kandidatin për president të koalicionit VLEN, Arben Taravarin, në shtabin qendror të koalicionit në Shkup. Pas publikimit të fotografisë së shtrëngimit të duarve, u ngritën shumë pyetje rreth përmbajtjes së bisedimeve: mbështetje për kandidaten e VMRO-DPMNE-së, Gordana Siljanovska, në raundin e dytë të zgjedhjeve apo marrëveshje për një qeveri të re pas zgjedhjeve të 8 majit?
Kryetari i Parlamentit të Kosovës, Glauk Konjufca, reagoi duke thënë se nuk ishte informuar për këtë takim dhe nuk do t’u kishte rekomanduar shqiptarëve të Maqedonisë së Veriut të votonin kandidaten e VMRO-DPMNE-së për presidente për shkak të “konceptit antishqiptar” të saj.
“Nuk qenkam i informuar për këtë takim. Mirëpo po të besoj, duke supozu që është e vërtetë, ç’ka me thënë… Sa i kam parë unë personalisht, ato konceptet politike që i ka zhvilluar edhe Gordana Siljanovska, ato janë shumë koncepte antishqiptare. Ka një dyshim për popullatën shqiptare atje dhe për të drejtat e saj. Unë jam shumë kundër këtyre koncepteve,” tha Konjufca.
Ai shtoi: “Unë do të isha kundër mbështetjes së çfarëdo shqiptari për koncepte të tilla. Kam dëgjuar me vëmendje dhe është një koncept antishqiptar që e ka shpjeguar vetë kandidatja. Unë nuk do të preferoja kurrfarë opsioni të tillë sepse është në dëm të shqiptarëve.”
Gordana Siljanovska Davkova, kandidatja e VMRO-DPMNE-së për presidente të Maqedonisë së Veriut, zhvilloi një fushatë me retorikë nacionaliste, duke propozuar edhe krijimin e një tribunali për luftën e UÇK-së në vitin 2001.
