Kërkohet shkarkimi i gjyqtares Enkeleda Hoxha në gjykatën e Krujës. Këshilli i Lartë Gjyqësorë vendos më 8 janar për rekomandimin e Inspektorit të Lartë të Drejtësisë, Artur Metani. Në kërkesën e tij, Metani ka sjellë argumentet se gjyqtarja ka cenuar besimin publik dhe ka shkelur ligjin me vendimet e dhëna.
Sipas ILD lirimi i personave me rrezikshmëri të lartë shoqërore para vuajtjes së plotë të dënimit, pranimi për ulje dënimi dhe pranimi i raporteve mjekësore të rreme të depozituar nga të dënuar janë vlerësuar shkelje e rëndë e ligjit. Më 8 janar KLGJ do të dëgjojë pretendimet dhe mbrojtjen e gjyqtares e më pas do vendos për fatin e saj.
Enkeleida Hoxha, në janar 2020, pranoi kërkesën e ish-numrit dy të bandës së Durrësit Endrit Dokle duke i hequr dënimin përjetë dhe dënuar përfundimisht me 25 vite. Po meqenëse Dokle kishte kryer 3/4 e kësaj mase të re dënimi, gjyqtarja Hoxha e liroi nga qelia me kusht, pas 16 viteve në qeli.
Për të argumentuar lirimin, gjyqtarja thekson në vendim se Dokle ka sjellje shumë të mirë, është penduar për vrasjet që ka bërë, vuan nga depresioni dhe se ka të atin sëmurë.
Në 7 nëntor 2017, Hoxha liroi nga burgu Genc Tafilin, i dënuar për vrasjen e komisarit të Policisë, Arben Zylyftari, në vitin 2000, në Shkodër. Po në nëntor të 2017 Hoxha liroi edhe Ilir Pajën nga burgu, të njohur me nofkën ‘UFO’ nga drejtësia italiane, pasi ishte arratisur tre herë. Gjithashtu po në nëntor të vitit 2017, gjyqtarja Hoxha i njohu vjetërsinë e punës për efekt pensioni një gruaje nga fshati Bilaj i Krujës, Marjana Prenuca, që në moshën 5-vjeçare.
Pak ditë më parë me kërkesë të ILD, KLGJ shkarkoi nga detyra gjyqtarin e Korçës, Markelian Kuqo për lirimin nga burgu të Gerd Gjinerarit.
/Gazetareforma.com/
