Gjyqtarja franceze Benedicte de Perthuis, e cila dha vendimin për dënimin me burg të Marine Le Pen dhe e ndaloi atë të kandidojë për presidente, është vënë nën mbrojtjen e forcave të armatosura të policisë.
Masa erdhi pas një vale kërcënimesh të drejtpërdrejta, të cilat besohet se kanë ardhur nga mbështetësit e ekstremit të djathtë.
Sipas burimeve policore për “Le Parisien”, gjyqtarja 63-vjeçare ka marrë një numër të madh mesazhesh kërcënuese.
Për këtë arsye, siguria rreth banesës së saj është forcuar. Edhe dy gjyqtarët e tjerë që ishin pjesë e trupit gjykues në Gjykatën Korrektuese të Parisit kanë qenë objekt kërcënimesh.
Ndërkohë, Le Pen është parë mbrëmë duke darkuar në një dhomë private në restorantin prestigjioz “Laurent” në Paris, një vend i njohur për evente të bujshme, përfshirë festën e 50-vjetorit të Kate Moss disa vite më parë.
Ish-kandidatja për presidente dhe mbi 20 anëtarë të tjerë të partisë së saj u shpallën fajtorë për keqpërdorim të fondeve publike, duke devijuar miliona euro nga buxheti i Bashkimit Evropian.
Për një periudhë mbi dhjetëvjeçare, ndërsa shërbenin si eurodeputetë në Bruksel dhe Strasburg, fondet që duhej të përdoreshin për aktivitetet parlamentare u përdorën në fakt për të financuar partinë Tubimi Kombëtar (RN) në Francë.
