SPAK ka zbuluar detaje të reja për megaoperacionin e zhvilluar këtë të hënë, duke shpallur masat e sigurisë për 21 persona, mes të cilëve janë anëtarë të organizatave kriminale, një zyrtar policie, një gjyqtar, një avokat dhe dy gazetarë.
Sipas hetimeve, ish-gjyqtarja Pajtime Fetahu është akuzuar për porositjen e goditjes fizike të gazetarit investigativ Saimir Kodra dhe një avokati mik të tij.
Nëpërmjet kontakteve me grupin kriminal Çopja, Fetahu ka përdorur një telefon të sigurt për të organizuar aktin, i cili nuk u realizua për shkak të dështimit të lokalizimit të gazetarit.
Gjyqtarja Fetahu, e njohur për lidhjet e saj të dyshuara me krimin, akuzohet gjithashtu për marrje ryshfeti në shuma të mëdha, duke përfshirë një shumë prej 11,000 eurosh dhe një monedhë floriri, për lehtësimin e pozicionit procedurial të anëtarëve të grupit Çopja.
Përveç kësaj, ajo është filmuar në një lokal të Suel Çelës, një personazh i njohur i botës së krimit.
Kjo është hera e parë që një njeri i drejtësisë në Shqipëri përfshihet në organizimin e sulmeve ndaj gazetarëve, duke ngritur shqetësime për ndikimin e krimit të organizuar në institucionet shtetërore.
Hetimet vazhdojnë ndërsa SPAK thekson përkushtimin për të çuar para drejtësisë të gjithë personat e përfshirë në këtë skemë. Marrë nga Prapaskena
