Ditën e sotme në Gjykatën e Krimeve të Rënda pritej të jepej pretenca për Klement Balilin, i njohur ndryshe si “Escobari i Ballkanit” në kuadër të trafikut ndërkombëtar të drogës, por për të tretën herë, seanca është shtyrë.
Shkak për shtyrjen mësohet të ketë qenë sërish mungesa e të pandehurit Balili dhe e avokatit të tij mbrojtës, Theodhori Sollaku. Duke mos e justifikuar në asnjë formë mungesën e tij, Sollaku është gjobitur me 10.000 lek. Ndërsa klienti i tij, Klement Balili ka deklaruar me anë të një shkrese se nuk mund të ishet prezent në seancë për shkak të gjendjes jo të mirë shëndetësore.
Të njëjtin argument ka paraqitur për mungesën e tij dhe avokati Remzi Ponari, i cili është caktuar enkas për të mos penguar vijueshmërinë e procesit.
Mësohet se senaca e radhës për çështjen e bujshme do të mbahet më 8 prill.
Mbi Balilin rëndojnë 4 akuza: Trafikim i lëndëve narkotike kryer në bashkëpunim në formën e grupit të strukturuar kriminal”, “Pjesëmarrje në grup të strukturuar kriminal”, “Refuzim për deklarim dhe moskdeklarim, fshehje ose deklarim të rremë të pasurisë” dhe “Pastrim të produkteve të veprimtarisë kriminale”
Balili nuk i ka pranuar akuzat, ndërsa pas rreth dy vjet në arrati ai u vetëdorëzua në momentin kur dosja vajti për gjykim.
